आदिवासी विविध कार्यकारी संस्था देऊळगाव केंद्रावर धान आणि बारदाना खरेदीत दीड कोटींचा घोटाळा प्रकरण.
📍संबंधितांवर तात्काळ गुन्हे दाखल करा. - अविश्यांत पंडा,जिल्हाधिकाऱ्यांचे आदेश.
एस.के.24 तास
गडचिरोली : महाराष्ट्र राज्य सहकारी आदिवासी विकास महामंडळ उपप्रादेशिक कार्यालय कुरखेडा अंतर्गत येत असलेल्या आदिवासी विविध कार्यकारी संस्था देऊळगाव केंद्रावर धान आणि बारदाना खरेदीत दीड कोटींचा घोटाळा झाल्याचे समोर आले आहे.
या गैरव्यवहाराची जिल्हाधिकारी अविश्यांत पंडा यांनी गंभीर दखल घेतली असून यात सहभागी खरेदी केंद्राचे पदाधिकारी व जबाबदार अधिकाऱ्यांवर तात्काळ गुन्हे दाखल करण्याचे आदेश दिले आहे. यामुळे घोटाळेबाजांचे धाबे दणाणले आहे.
गडचिरोली जिल्ह्यात दरवर्षी धान खरेदी हंगामात कोट्यवधींचा घोटाळा समोर येत असतो. याप्रकरणी वर्षभरापूर्वी तत्कालीन प्रादेशिक व्यवस्थापकाला अटक देखील करण्यात आली होती.
यंदाही आदिवासी विकास महामंडळ उपप्रादेशिक कार्यालय कुरखेडा अंतर्गत येत असलेल्या आदिवासी विविध कार्यकारी संस्था देऊळगाव खरेदी केंद्रावर १ कोटी ५३ लाखांचा गैरव्यावहार झाल्याचा ठपका ठेवण्यात आला आहे.
काही दिवसांपूर्वी प्रादेशिक व्यवस्थापक सोपान सांबरे यांनी देऊळगाव खरेदी केंद्रावर भेट दिली असता त्यांना २०२३-२४ हंगामात खरेदी करण्यात आलेले धान आणि बारदाण्याविषयी संशय निर्माण झाला.
त्यांनी तात्काळ चौकशी समिती मार्फत तपासणी केली असता कागदावर असलेल्या १९८६० क्विंटल धान आणि ४९७५१ बारदान्यात ३९४४ क्विंटल धान व १४१४८ बारदान्याची तफावत आढळून आली.
इतकेच नव्हे तर भरडाईकरिता पाठविण्यात आलेल्या एका बारदान्यात ४० किलो ऐवजी ३० किलो धान भरण्यात आल्याचेही दिसून आले. प्रथमदर्शनी यात एकूण १ कोटी ५३ लाखांचा गैरव्यवहार झाल्याचे नोटीसमध्ये नमूद करण्यात आले आहे.
याप्रकरणी आदिवासी विकास महामंडळाच्या प्रादेशिक व्यवस्थापकांना जिल्हाधिकारी अविश्यांत पंडा यांनी संबंधितांवर तात्काळ गुन्हे दाखल करण्याचे निर्देश दिल्याने एकच खळबळ उडाली आहे.
उपप्रादेशिक व्यवस्थापकाच्या अडचणीत वाढ : -
वरिष्ठ अधिकाऱ्यांच्या वरदहस्थाशिवाय खरेदी केंद्रावरील पदाधिकारी एवढा मोठा घोटाळा कसा काय करू शकतात, असा प्रश्न उपस्थित करण्यात येत आहे. देऊळगाव केंद्रावर झालेल्या घोटाळ्यामुले आदिवासी विकास महामंडळाचे कुरखेडा उपप्रादेशिक व्यवस्थापक कार्यालय संशयाच्या फेऱ्यात सापडले आहे.
या प्रकरणी जिल्हाधिकाऱ्यांनी तात्काळ संबंधितांवर थेट गुन्हे दाखल करण्याचे आदेश दिल्याने कुरखेडा कार्यालयाचे उपप्रादेशिक व्यवस्थापक मुरलीधर बावणे अडचणीत सापडले आहे. त्यामुळे प्रादेशिक व्यवस्थापक याप्रकरणी कुणाविरोधात तक्रार दाखल करतात याकडे प्रशासकीय वर्तुळाचे लक्ष लागले आहे.
देऊळगाव येथील धान खरेदी केंद्रावरील तपासणीत प्रथमदर्शनी गैरव्यवहार झाल्याचे निष्पन्न झाले आहे. संबंधित केंद्राचे पदाधिकारी व अधिकाऱ्यांवर गुन्हे दाखल करण्याचे आदेश दिले आहे.जिल्ह्यातील इतरही संशयास्पद केंद्रांची तपासणी केली जाणार. -अविश्यांत पंडा,जिल्हाधिकारी गडचिरोली
