जहाल नक्षलवादी रघू आणि जैनीसह चार जणांना अटक ; अटक करण्यात आलेल्या नक्षलवाद्यांवर 40 लाखांचे बक्षीस होते.
एस.के.24 तास
भामरागड : दक्षिण गडचिरोलीतील नक्षल चळवळीचा मोठा नेता तसेच जहाल नक्षलवादी रघू आणि त्याची पत्नी जैनी यांच्यासह चार जणांना अटक करण्यात गडचिरोली पोलिसांना यश आले.भामरागड तालुक्यातील दिरंगी, फुलनार जंगलात झालेल्या चकमकीत ते सहभागी होते. यात सी- ६० जवान महेश नागूलवार शहीद झाले होते. अटक करण्यात आलेल्या नक्षलवाद्यांवर ४० लाखांचे बक्षीस होते.
दक्षिण गडचिरोली विभागीय समिती सदस्य
1) सायलू भुमय्या मुड्डेला ऊर्फ रघू ऊर्फ प्रताप ऊर्फ इरपा वय,55 वर्ष, रा.लिंगापूर ता.दरपेल्ली जि. निजामाबाद, तेलंगणा)
भामरागड दलमची विभागीय समिती सदस्य व भामरागड एरिया कमिटी सचिव
2) जैनी भीमा खराटम ऊर्फ अखिला ऊर्फ रामे वय,41 वर्ष रा.कंचाला ता.भोपालपट्टानम,जि. बिजापूर, छत्तीसगड)
भामरागड दलम सदस्य
3) झाशी दोघे तलांडी उर्फ गंगू वय,30 वर्ष रा. येचली,ता.भामरागड),
4) मनीला पिडो गावडे उर्फ सरिता वय, 21 वर्ष,रा. कापेवंचा ता.अहेरी)
अशी अटक करण्यात आलेल्या नक्षलवाद्यांची नावे आहेत.
भामरागड तालुक्यातील ताडगाव पोलीस ठाणे हद्दीतील पल्ली जंगलात काही नक्षलवादी फिरत असल्याची माहिती पोलिसांना मिळाली होती. त्यानुसार ताडगाव ठाण्याचे पोलीस पथक व राज्य राखीव दलाच्या 09 बटालियनने आज, शनिवारी संयुक्त मोहीम राबवली. त्यानंतर या चौघांना अटक करण्यात आली.
11 फेब्रुवारी ला दिरंगी-फुलनार जंगल परिसरात झालेल्या चकमकीमध्ये C -60 जवान महेश नागूलवार शहीद झाले होते.या चकमकीत या चौघांचा प्रत्यक्ष सहभाग होता.
विशेष पोलीस महानिरीक्षक (नक्षलविरोधी अभियान) संदीप पाटील, उप-महानिरीक्षक अंकित गोयल, उप-महानिरीक्षक (अभियान) अजय कुमार शर्मा, पोलीस अधीक्षक नीलोत्पल, 09 बटालियनचे कमांडंट शंभू कुमार,अपर अधीक्षक यतीश देशमुख, एम.रमेश, सत्य साई कार्तिक, उपअधीक्षक,विशाल नागरगोजे, अमर मोहिते यांच्या मार्गदर्शनाखाली ही कारवाई पार पडली.
दोघांवर शंभरहून अधिक गुन्हे : -
अटकेतील वरिष्ठ जहाल नक्षलवादी रघू व त्याची पत्नी जैनी यांच्यावर अनुक्रमे 77 व 29 असे एकूण 106 गुन्हे नोंद आहेत.रघुने 1990 मध्ये सिरनापल्ली दलममधून सदस्य पदावरून काम सुरू केले होते, तर जैनीने पेरमिली दलममधून सदस्य पदावर भरती होऊन 2001 मध्ये नक्षल चळवळीतील कारकीर्द सुरू केली.
महत्त्वाच्या कारवाया करून त्यांनी पदोन्नती मिळवत विभागीय समिती सदस्यपदापर्यंत मजल मारली होती. दलम सदस्य झाशी दोघे व मनिल पिडो यांच्यावरही अनुक्रमे 14 व 11 गुन्हे नोंद आहेत.
