एक देश एक निवडणूक हा मुद्दा चर्चेत ; तेलंगना व महाराष्ट्र सीमेवरील 14 वादग्रस्त गावांतील 5 हजार मतदार 2 वर्षात 4 वेळा मतदान करणार.
एस.के.24 तास
जिवती : एक देश एक निवडणूक हा मुद्दा चर्चेत असतांना तेलंगना व महाराष्ट्र सीमेवरील चौदा वादग्रस्त गावांतील पाच हजार मतदार दोन वर्षात चौथ्यांदा मतदान करणार आहे.विशेष म्हणजे येथील मतदारांनी यापूर्वी तेलंगना विधानसभा, तेलंगना लोकसभा, महाराष्ट्र लोकसभा निवडणुकीसाठी मतदान केले आहे.
देशातील जनतेला निवडणुकीत एकदाच मतदान करण्याचा अधिकार आहे.जिल्ह्यातील १४ वादग्रस्त गावांमध्ये चार ते पाच हजार मतदार आहेत, जे दोनदा मतदान करतात. याचे कारण महाराष्ट्र आणि तेलंगणा सरकार आहे. सीमावादात दोन्ही राज्यांची सरकारे या गावांवर आपला हक्क सांगतात आणि येथील लोकही दोन्ही सरकारच्या योजनांचा लाभ घेतात.
गेल्या दोन वर्षांत विधानसभा आणि लोकसभा निवडणुकीत प्रत्येकी तीनदा मतदान केल्यानंतर हे मतदार आता महाराष्ट्र विधानसभेच्या राजुरा मतदार संघासाठी २० नोव्हेंबर रोजी मतदान करणार आहेत. यापूर्वी ३० नोव्हेंबर २०२३ रोजी तेलंगणा राज्यातील आसिफाबाद मतदार संघासाठी सुमारे ४ हजार लोकांनी मतदान केले होते.
लोकसभा निवडणुकीत चंद्रपूर लोकसभेसाठी १९ एप्रिलला आणि आसिफाबाद लोकसभेसाठी १३ मे २०२४ रोजी मतदान केले होते. आता २ हजार ७८१ पुरुष आणि २ हजार ५१२ महिला असे एकूण ५ हजार २९३ मतदार २० नोव्हेंबर २०२४ रोजी होणाऱ्या महाराष्ट्र विधानसभा निवडणुकीत मतदान करणार आहेत.
मुकादमगुडा, परमडोली, परमडोली (तांडा), कोठा, लेंडीजळा, महाराजगुडा, शंकरलोधी, पद्मापती, अंतापूर, इंदिरानगर,येसापूर, पलासगुडा,भोलापठार, लेंडीगुडा ही १४ गावे महाराष्ट्र व तेलंगना राज्याच्या सीमेवर जिवती तालुक्यात आहेत. दोन राज्यांचा हा सीमावाद गेल्या अनेक दशकांपासून सुरू आहे. गावातील नागरिकांकडे दोन्ही राज्यांची मतदान पत्रिका आहेत. महाराष्ट्र आणि तेलंगणा या दोन्ही राज्यांच्या निवडणुकांमध्ये मतदार मतदान करतात. लोकांच्या मते, तेलंगणा सरकारने या गावांमध्ये महाराष्ट्र सरकारपेक्षा जास्त विकास कामे केली आहेत.
त्यामुळे या गावांतील नागरिकांचा कल तेलंगणाकडे अधिक आहे. गावांची मुख्य मागणी ही वनजमीन पट्टे देण्याची आहे. मात्र राज्य सरकार देऊ शकलेले नाही. तेलंगणा सरकारने जमिनीचे पट्टे वितरीत केले आहेत. येथे दोन्ही राज्यांतील शाळा आहेत. ग्रामपंचायतीही आहेत. एवढेच नाही तर सरपंचही वेगळा आहे.
लोकसभा निवडणुकीत या चौदा गावातील लोकांच्या बोटांवर शाईचा प्रयोग केला होता. मात्र तरीही येथील लोकांनी दोन राज्यांच्या मतदानात बऱ्याच दिवसांचे अंतर असल्याने दोन्हीकडे मतदान केले होते. आता पून्हा या गावातील लोकांना चौथ्यांना मतदान करता येणार आहे.
