मी माझ्या विजयाबद्दल आश्वस्त. - प्रतिभाताई धानोरकर यांचा दावा
एस.के.24 तास
चंद्रपूर : लोकसभा निवडणुकीचा निकाल देशाच्या दृष्टीने अत्यंत महत्वाचा आहे. मी माझ्या विजयाबद्दल आश्वस्त असून जनतेने सेवा करण्याची संधी दिल्यास संधीचे सोने करुन चंद्रपूर लोकसभा क्षेत्राच्या विकासासाठी मी सदैव कटिबद्ध राहील,अशी प्रतिक्रिया महाविकास आघाडीच्या उमेदवार आमदार,प्रतिभाताई धानोरकर यांनी व्यक्त केली.
चंद्रपूर-वणी-आर्णी लोकसभा मतदारसंघातील जनता महाविकास आघाडीच्या बाजूने कौल देईल, असा आमदार प्रतिभा धानोरकर यांना विश्वास आहे. एका मतदानोत्तर चाचणीत आमदार धानोरकर आघाडीवर राहतील असा अंदाज वर्तविण्यात आलेला आहे. या पार्श्वभूमीवर आमदार,प्रतिभाताई धानोरकर यांच्याशी संपर्क साधला असता त्यांनी विजयी होण्याचा विश्वास बोलून दाखविला.
मंगळवार ४ जून रोजी मतमोजणीला सुरुवात होणार आहे. मतमोजणीच्या पूर्वसंध्येला विजयाबद्दल पूर्णपणे आशावादी असल्याचे आमदार धानोरकर यांनी सांगितले. २०१९ च्या लोकसभा निवडणुकीत या मतदारसंघातील जनतेने बाळू धानोरकर यांच्यावर विश्वास दाखवीत त्यांना विजयी केले होते.
स्व. खासदार बाळू धानोरकर यांच्यावर जनतेने दाखविलेला विश्वास २०२४ च्या लोकसभा निवडणुकीत जनता कायम ठेवणार आणि मला निवडून देईल, असाही दावा आमदार,प्रतिभाताई धानोरकर यांनी व्यक्त केला.
या लोकसभा मतदारसंघातील जनतेचे, मतदारांचे धानोरकर कुटुंबीयांवर विशेष प्रेम आहे. या प्रेमाचा प्रत्यय जनता या निवडणुकीत विजयी गुलाल उधळून देणार आहे. लोकसभा निवडणुकीत महाविकास आघाडीत सहभागी सर्व घटक पक्षांनी एकदिलाने काम केले.
प्रत्येक कार्यकर्त्याने जनतेशी, मतदारांशी असलेली बांधिलकी जोपासली आहे.त्यामुळे विजय महाविकास आघाडीचाच आहे,असेही आमदार,प्रतिभाताई धानोरकर म्हणाल्या.
