व्याहाड बुज.बस स्टॉप रस्त्याला लाईट लावण्यात यावे. - माजी ग्रा.प.सदस्य अनिल गुरनुले यांची मागणी.
एस.के.24 तास
सावली : सावली तालुक्यातील व्याहाड बूज. येथे गावापासून बस स्टॉप हे अंतर १ किमी.आहे. या मार्गावरून रात्रीच्या वेळेस येताना सर्वत्र अंधाराचे साम्राज्य राहत होते.यामुळे गावकऱ्यांना पायी येतांना रान डुक्कर आणि लुटारू या समस्येला तोंड द्यावे लागत होते.
ही समस्या लक्षात घेऊन सन २००९-१० मध्ये व्याहाड बूज.च्या तत्कालीन सरपंच सौ.वंदनाताई गुरनुले यांनी तत्कालीन मंत्री छगन भुजबळ आणि मंत्री आर.आर.पाटील यांच्या माध्यमातून व्याहाड बूज. गावापासून बस स्टॉप पर्यंत विद्युत लाईट चे ३० विद्युत खांब मंजूर करवून घेतले होते.आणि त्या रस्त्याला लाईट लावले गेले.यामुळे जनतेच्या अंधारात येणाऱ्या समस्येला कायम स्वरुपी तोडगा निघाला.
सद्या परिस्थितीत या रस्त्यावरून बिबट,वाघ,रान डुक्कर,कोल्ह्या,साप,विंचू यांचे रात्रीच्या वेळेस कायम स्वरूपी नित्यनेमाने दर्शन होत असतात.मात्र गेल्या एक वर्षापासून या रस्त्यावर येथील ग्रामपंचायत ने एक विद्युत खांब सोडून लाईट लावले.कालांतराने त्यातीलही बरेचसे लाईट बंद झाले असल्यामुळे रात्रोच्या वेळेस बाहेरगावावरून पायी येणाऱ्या नागरिकाला तसेच सकाळी फिरायला जाणाऱ्या नागरिकांना या अंधाराच्या समस्येला तोंड द्यावे लागत आहे.
तसे बघायला गेले तर गावातील ग्रामपंचायत ला वीज,पाणी,नाल्या साफसफाई हे कामे सतत करावी लागतात.मात्र येथील ग्रामपंचायतचे या रस्त्याकडे दुर्लक्ष झाल्यामुळे आणि या रस्त्यावर अंधाराचे साम्राज्य पसरले असल्यामुळे प्रसंगी जीवितहानी होण्याची शक्यता फेटाळता येत नाही.यामुळे ही समस्या लक्षात घेऊन या रस्त्यावरील विद्युत खांबाला त्वरित लाईट लावण्यात यावे.
या मागणीसाठी माजी ग्रा.प.सदस्य अनिल गुरनुले यांनी ग्राम विकास अधिकारी मसराम यांना निवेदन दिलेले आहे.या वेळेस महादेव लेनगुरे,मुकरू गुरनुले, गोकुळ लेनगुरे,स्वप्नील गुरनुले आणि इतर गावकरी उपस्थित होते .
